Gjyqi i Gërdecit: Avokatët e Mediut kundërshtojnë ekspertizën ekonomiko-financiare

Ish-ministri i Mbrojtjes, Fatmir Mediu, i marrë i pandehur për shpërdorim detyre dhe shpërdorim detyre në kuadër të Kodit Penal Ushtarak, nuk ishte i pranishëm në seancën e kësaj të mërkure në GJKKO, ndërsa avokatët e tij kundërshtuan ekspertizën ekonomiko-financiare të paraqitur në gjyq.

Avokati Henrik Ligori tha:
“Kemi objeksione mbi formën dhe përmbajtjen e akt-ekspertimit ekonomiko-financiar. Ekspertët nuk kanë cilësinë e duhur. Ata vetë kanë pranuar që nuk janë ekspertë, por vetëm specialistë të ftuar nga prokuroria për të dhënë një mendim.”

Sipas tij, ekspertiza është jashtë kontekstit të fakteve:
“Ekpertët nuk marrin në konsideratë asnjë faktor tjetër që ka ndikuar gjatë këtyre 15 viteve në trajtimin e konkluzioneve të tyre. Procesi i demontimit të municioneve nuk filloi dhe përfundoi vetëm me Gërdecin; ky proces ka ndodhur para dhe pas tij.”

Avokati shtoi se ekspertët ishin thirrur për të dhënë mendime shkencore, por shumë përgjigje të tyre ishin të standardizuara:
“Gati 80% e pyetjeve që ne kemi shtruar kanë marrë përgjigje standarde: ‘Kjo nuk ka të bëjë me ekspertimin’. Pyetja që unë shtroj është: Cila është baza ligjore mbi të cilën janë mbështetur përfundimet e tyre?”

Avokati Ligori gjithashtu theksoi se ekspertët nuk kanë marrë parasysh një vendim të gjykatës së Beratit, i cili është lënë në fuqi nga Gjykata e Lartë:
“Ata nuk kanë parë vendimin që saktëson se shifrat e paraqitura nga kombinati i Poliçanit janë të sakta, ndërsa ata e kanë marrë atë apriori të gabuar.”

Ligori kritikoi gjithashtu se dokumentet e shqyrtuara nga ekspertët nuk përbëjnë më shumë se 20% të dokumentacionit të nevojshëm dhe se shumë prej përgjigjeve të tyre kanë qenë të karakterit juridik, që nuk është në kompetencën e tyre.

“Kam një listë aktesh ligjore dhe nënligjore që ekspertët nuk i kanë parë. Ndërmarrja MEICO konsiderohet si palë e tretë, por ekspertët nuk kanë të qartë se çfarë është ajo ose kanë zgjedhur të mos e kuptojnë. Ata nuk e dinë që është një ndërmarrje e Ministrisë së Mbrojtjes,” tha ai.

Ligori përfundoi duke theksuar rëndësinë e interesave të përbashkëta mes shtetit shqiptar dhe procesit të demontimit për hir të anëtarësimit në NATO:
“Çfarë pune kanë ekspertët ekonomiko-financiarë të dalin në konkluzione të tilla për përgjegjësinë juridike? U është lënë një ‘patate e nxehtë’ në dorë.”

LEXONI GJITHASHTU:

• Mediu në SPAK, kërkon ripërsëritje të pjesshme të aktekspertimit për Gërdecin
• Gërdeci| Shtyhet seanca në Gjykatën e Posaçme për ish-ministrin Fatmir Mediu