“Gërdeci”, avokati i Mediut: S’mund të akuzohet ministri se nuk njeh kalibrat, ka funksion politik

Ketë të martë në GJKKO ka vijuar gjykimi i dosjes Gërdeci, ku ish-ministri Fatmir Mediu është marrë i pandehur për veprën penale të shpërdorimit të detyrës.

Përballë gjyqtares Irena Gjoka dhe prokurorit Arben Kraja, avokati mbrojtjes Henrik Ligori relatoi mbi disa parashtrime të prokurorisë.

 “Ministria e Mbrojtjes është një strukturë me dy krerë; një pjesë politike dhe pjesa tjetër shtabi i përgjithshëm. Njerëzit që kanë pasur përgjegjësi për Gërdecin kanë marrë përgjegjësi. Sa i takon akuzës për municionet, nuk ka asnjë akt ligjor që e ndan kalibër i madh dhe kalibër i vogël. Ministri i mbrojtjes përgjigjet për politikat e ministrisë. Nuk mund të akuzohet se nuk i njeh kalibrat. Me këtë punë merret shtabi i përgjithshëm. Si mund që ministrit politik t’i ngarkohet përgjegjësi teknike? Sa i takon akuzës së transportit, nuk është detyra e ministrit sepse ka strukture që merret me faturat. Duket që akuza e bërë nga prokurori është e pambështetur”, tha avokati.

Irena Gjoka lexoi para gjykatës përgjigjen e kërkesës së mbrojtësve për përjashtimin e saj.

“Pasi u mor në shqyrtim është vendosur papajtueshmëri mbi kërkesën e mbrojtjes. Mosrespektimi i afatit ka sjellë edhe papajtueshmëri të kërkesës së avokatëve”, tha Gjoka.