Gjyqtarët kërkojnë rritjen e pagës: Kallëzim penal për ata që e pengojnë

Unioni i gjyqtarëve paralajmëron kallëzim penal nëse qeveria nuk zbaton vendimin e Gjykatës Kushtetuese që u njohu atyre të drejtën për rritjen e pagës bazë dhe pensionit suplementar. Unioni i ka bërë thirrje KLGJ-së edhe për plotësimin e vakancave në sistem.

Në nëntor të vitit të kaluar Gjykata Kushtetuese i dha të drejtë unionit të gjyqtarëve. Sipas këtij vendimi, qeveria detyrohet të paguajë një shtesë prej 14 mijë lekësh mbi pagën bazë të çdo magjistrati që nga viti 2019 e në vazhdim dhe të pranojë një përllogaritje të re të pensionit në bazë të kontributeve. Por ndonëse kanë kaluar më shumë se 3 muaj ky vendim nuk po zbatohet.

Kryetar i unionit të gjyqtarëve Gerdi Hoxha, tha se ligjvënësit duhet të tregohen të kujdesshëm në veprimet që kryejnë pas vendimit të Kushtetueses.

“Do t’i bëjmë thirrje edhe atyre që e kanë në dorë, ligjvënësve të tregohen më të kujdësshëm me veprimet që po kryejnë pas daljes së vendimit të Gjykatës Kushtetuese. Jemi apo jo përballë një fakti penal, duhet të vazhdojmë të bëjmë kallëzime penale kundër atyre personave që e pengojnë ekzekutimin e vendimit të Gjykatës Kushtetuese”.

Vendimi që u mundëson rritjen e pagës magjistratëve u mor njëzëri nga Gjykata Kushtetuese ndërsa apeli i unionit të gjyqatarëve në mbledhjen e asamblesë së përgjithshme ishte edhe për plotësimin sa më të shpejtë të vakancave në sistem.

LEXONI GJITHASHTU:

• “Revolucioni”, Spahiu: S’do ulin njerëzit qepenat që të vijë Berisha në pushtet
• Berisha: Jemi në një revolucion, Rama është i interesuar për dhunë
• Bie mbështetja për ‘revolucionin’, shumë pak parti aleate po përkrahin Berishën