Goditet prostitucioni në një lokal në Fier, arrestohen dy gra nga Uganda

Policia e Fierit ka goditur një rast prostitucioni që kryhej në një lokal në fshatin Mbrostar.

Operacioni i koduar “Prive”, u finalizua pas një hetimi shtatëmujor dhe çoi në arrestimin e pesë personave: tre shtetas shqiptarë të dyshuar si organizatorë dhe dy gra nga Uganda që ushtronin prostitucion.

Sipas hetimeve, shtetaset nga Uganda ishin punësuar fillimisht për performanca kërcimi, por më pas shfrytëzoheshin për prostitucion, ndërsa tre të rinjtë shqiptarë kishin rolin e rekrutuesve dhe administratorëve të aktivitetit të paligjshëm. Gjatë kontrolleve policia sekuestroi shuma parash të përfituara nga veprimtaria, dy armë të ftohta dhe një automjet.

“Gjatë operacionit “Prive”, u arrestuan shtetasit O. P., 29 vjeç, banues në Fier, K. H., 24 vjeçe, banuese në Peqin, O. G., 32 vjeçe, banuese në Fier, R. M., 24 vjeçe, banuese në Uganda dhe Sh. N., 22 vjeçe, banuese në Uganda.

Nga hetimet ka rezultuar se në një lokal në Mbrostar, ku shtetaset nga Uganda ishin punësuar për të performuar kërcime, ato ushtronin dhe prostitucion. Organizatorë të dyshuar të kësaj veprimtarie kriminale janë 3 shtetasit shqiptarë, në rolet e rekrutuesve dhe administratorëve”, thuhet në njoftimin e policisë.

Materialet procedurale i janë referuar Prokurorisë së Fierit, e cila po ndjek më tej hetimet.