Goditi portierin që i dëmtoi djalin, dënohet babai i futbollistit shqiptar

Drejtësia italiane nuk e ka lënë jashtë vëmendjes episodin e dhunës në sfidën Cesena-Olbia, e mbyllur në shifrat 1-1. Në përfundim të kësaj përballje, babai i dy futbollistëve me origjinë shqiptare Cristian e Stiven Shpendi, goditi me grusht portierin e ekipit kundërshtar, Filipo Rinaldi.

Pas këtij episodi, Liman Shpendi është dënuar, duke u përjashtuar për 3 vite nga çdo aktivitet sportive në Itali. E thënë ndryshe, personi në fjalë e ka të ndaluar të ndjekë në stadium dy djemtë e tij futbollist, njëri që luan tek Cesena dhe tjetri tek Empoli.

Liman Shpendi hyri në fushë dhe vrapoi drejt portierit të Olbias, duke e goditur këtë të fundit me grusht, ndërsa shkak ishte bërë një përplasje mes dy futbollistëve në fushë. Pamjet e veprimit antisportiv bënë xhiron e mediave botërore.

Reagimet ishin të shumta, fillimisht skuadra e Olbias e cila u bënte thirrje autoriteteve të garantonin sigurinë në një ndeshje futbolli, teksa edhe vetë Cesena, e cila u distancua nga dhuna në fjalë.

Cesena renditet e para në tabelën e klasifikimit, ndërsa është shumë pranë rikthimit në Serinë B.

LEXONI GJITHASHTU:

• Qëlloi portierin që i dëmtoi të birin, kërkon falje babai i sulmuesit të kombëtares
• I dëmtoi djalin, babai i futbollistit të kombëtares futet në fushë, qëllon portierin
• “Do ta shihni ç’do ju bëj”| Babai i 29-vjeçarit: Hakmarrje, djali s’abuzoi me vajzën