Grabitja në Vermosh, eksperti fajëson shtetin: Qytetarët nuk janë të mbrojtur

Eksperti i sigurisë, Fatjon Softa e konsideron të rëndë ngjarjen e ndodhur orët e para të mëngjesit të së enjtes në Vermosh, ku dy të moshuar u grabitën në banesën e tyre.

Në emisionin “Sot” në “Euronews Albania”, Softa tha se shteti është fajtor, për shkak se qytetarët në banesat e tyre ndihen të pasigurtë dhe se nuk po mblidhen armët të cilat zotërohen nga grupe të cilët kryejnë grabitje apo vepra të tjera kriminale.

“Unë fajësoj shtetin për një gjë, pasiguria që i jep qytetarëve në banesa. E dyta, armët janë sheshit ende dhe nuk po mblidhen. Nëse ata do të shkonin me mjete rrethanore, mund të mos e fajësoje shtetin. Por, aq sa kohë mbajnë armë dhe armët qarkullojnë, tregon se shteti është dorëzuar para mbledhjes dhe grumbullimit të armëve”, u shpreh ai.

Sipas ekspertit, nuk ka funksionuar sistemi i amnistive për armët, tesksa shtoi se shteti nuk ka punuar për parandalimin e ngjarjeve dhe për të identifikuar grupet e ndryshme që kanë armë.

E moshuara nga Vermoshi, Miri Tinaj rrëfeu momentet nga grabitja e banesës së saj në orët e para të mëngjesit.

Ajo u shpreh se dy persona të armatosur grabitën me maska banesën e saj, ku morën para, një makinë dhe sende floriri.

LEXONI GJITHASHTU

• ‘Të armatosur, na goditën me leva’, e moshuara në Vermosh tregon për grabitjen
• Grabiten të moshuarit në Vermosh, hajdutët aksidentohen