Grabitje e trafik droge/ 39 të arrestuar në Itali, pjesë e grupit kriminal shqiptar

Në mëngjesin e 5 shkurtit 2025, Karabinierët e Komandës Provinciale të Riminit realizuan një operacion të gjerë që çoi në arrestimin e 39 individëve, të akuzuar për vjedhje, grabitje dhe trafik droge.

Hetimi, i nisur disa muaj më parë nga Seksioni i Operacioneve të Ricciones, çmontoi një rrjet kriminal që përbëhej kryesisht nga shtetas shqiptarë, të cilët vepronin në Emilia-Romagna dhe në rajone të tjera të Italisë.

Operacioni, i cili përfshinte më shumë se 200 efektivë, u zhvillua në disa provinca dhe u mbështet nga departamentet e specializuara dhe forcat lokale të policisë.

Hetimet zbuluan përgjegjësitë për vjedhjet e shumta të shtëpive dhe një rrjet të gjerë trafiku të kokainës, i menaxhuar me një sistem të sofistikuar tregtarësh që mundësonte shmangien e kontrolleve të policisë.

Droga shpërndahej jo vetëm në Riviera, por edhe në Marche dhe San Marino, me dërgesa në shtëpi që bëheshin sipas kërkesës.

Nga operacioni, u sekuestruan mbi 253 kg kokainë dhe 40 kg hashash, me një vlerë që llogaritet të jetë mbi 8 milionë euro në shumicë dhe 25 milionë euro në pakicë.

Po ashtu, u gjetën armë zjarri, bizhuteri, orë dhe mallra luksi me vlerë të konsiderueshme.

Në hetime, autoritetet po shqyrtojnë një lidhje të mundshme midis një prej grupeve kriminale dhe vjedhjes së ndodhur më 29 dhjetor në shtëpinë e Pierina Paganelli, gruas së vrarë në tetor të vitit 2023.

Hajdutët ishin futur në shtëpi duke thyer një kasafortë, e cila u gjet më vonë e zbrazur në një fushë të afërt.

Një nga rezultatet e rëndësishme të operacionit është kapja e një të arratisuri të rrezikshëm në Piacenza dhe arrestimi i një karabinieri, i cili, bashkë me gruan e tij, ishte i përfshirë në planifikimin e një grabitjeje.

Gjyqtari hetues ka vendosur masa sigurie për 26 individë, ndërsa disa të tjerë janë ende në kërkim, duke përfshirë ata jashtë vendit.

LEXONI GJITHASHTU:

• Grabitje e trafik droge/ 39 të arrestuar në Itali, pjesë e grupit kriminal shqiptar
• Plagoset 26-vjeçari pas një konflikti në Lushnjë, policia arreston autorin e dyshuar