Greqia blen tre anije të reja franceze

Greqia do të blejë tre fregata (anije) të reja franceze. Parlamenti në shtetin fqinj miratoi marrëveshjen prej 3 miliardë eurosh.

Për zyrtarët e mbrojtjes këto mjete janë jetike përballë  tensioneve të vazhdueshme me Turqinë fqinje.

Ligjvënësit votuan gjithashtu në favor të shtimit të gjashtë avionëve të rinj luftarakë Rafale.

Blerjet  ushtarake u miratuan nga 157 ligjvënës të qeverisë së qendrës së djathtë në parlamentin prej 300 vendesh, me mbështetjen e dy partive opozitare.

Partia e majtë opozitare kundërshtoi blerjen shtesë të avionëve luftarakë francezë.

Kryeministri  Kyriakos Mitsotakis mohoi pretendimet e kundërshtarëve politikë se blerjet mund të tronditin ekonominë greke.

Të prodhuara nga Grupi Naval i Francës, dy anije luftarake do të dorëzohen në vitin 2025 dhe e treta vitin e ardhshëm. Ministri grek i Mbrojtjes tha se ushtria greke duhet të modernizohet pas shkurtimeve të përsëritura për shkak të krizës financiare që ka kaluar shteti fqinj.

Anëtarët e NATO-s, Greqia dhe Turqia mbeten në mosmarrëveshje mbi kufijtë detarë dhe të drejtat e shfrytëzimit të mineraleve në Detin Egje dhe në Mesdheun lindor. Një studim turk i naftës dhe gazit në vitin 2020 rezultoi në një përplasje të tensionuar detare midis dy vendeve.

LEXONI GJITHASHTU:

• 12 emigrantë vdesin në kufirin Turqi-Greqi