Hajdutët shkrijnë një byzylyk ari 3000-vjeçar që i përkiste faraonit egjiptian

Një byzylyk ari 3000-vjeçar që u zhduk nga një muze egjiptian në fillim të këtij muaji është vjedhur dhe shkrirë, njoftoi sot Ministria e Brendshme egjiptiane.

Byzylyku, i zbukuruar me rruaza lapis lazuli, i përkiste mbretit Amenemope të Periudhës së Tretë Kalimtare rreth vitit 1000 para Krishtit, raportoi Reuters.

Bizhuteria u zhduk më 9 shtator nga një kasafortë në laborator, duke bërë që autoritetet egjiptiane të nisin një kërkim dhe të shtojnë kontrollet në aeroporte, porte dhe kufij për shkak të frikës nga kontrabanda.

Hetimi çoi te një specialist i restaurimit të muzeut, i cili vodhi artefaktin dhe ia shiti një tregtari argjendi.

Tregtari ia dha pronarit të një punishteje në pjesën historike të Kajros, i cili ia shiti byzylykun një shkrirëseje ari, ku metali përzihet me objekte të tjera.

Ministria përkatëse deklaroi se të dyshuarit u arrestuan dhe se të ardhurat nga shitja me vlerë rreth 4,000 dollarë u konfiskuan.

Incidenti ndodhi disa javë para hapjes së planifikuar në nëntor të Muzeut të Madh Egjiptian pranë piramidave të Gizës, një projekt kyç për të promovuar trashëgiminë e lashtë dhe për të tërhequr turistë të huaj, raportoi Reuters.

LEXONI GJITHASHTU:

• Shfaqet vetëm dy herë në vit, ja çfarë ndodh me statujën e faraonit të Egjiptit
• Zbulohet varri i parë faraonik në 100 vitet e fundit