Hapja e grupkapitullit VI për Shqipërinë, Kos: Sinjal gjeopolitik, forcojmë sigurinë

Komisionerja për Zgjerimin dhe Fqinjësinë e Mirë në BE, Marta Kos, përshëndeti hapjen e negociatave për grupkapitullin e 6-të mes Shqipërisë dhe BE-së.

Në një konferencë të përbashkët në Bruksel, në krah të kryeministrit Rama, Kos deklaroi se hapja e grupkapitullit të 6-të, që lidhet me marrëdhëniet me jashtë, është një sinjal gjeopolitik për stabilitetin dhe sigurinë e Ballkanit Perëndimor.

Kos theksoi se harmonizimi i politikave të jashtme mes Shqipërisë dhe Bashkimit Evropian forcon jo vetëm sigurinë në kufijtë e BE-së, por edhe në vetë Unionin.

“Për sa i përket negociatave dhe hapjes së grupkapitullit të parë, tashmë negociatat janë të hapura. Sot ne hapim grupkapitullin e 6-të për marrëdhëniet me jashtë. Shpresoj që Presidenca polake të vazhdojë përpjekjet në të ardhmen. Do të fillojmë edhe me mbylljen e mandatit tim.

Ky vendim i sotëm është një sinjal i qartë për Shqipërinë dhe Ballkanin Perëndimor se zgjerimi mbetet një prioritet për Bashkimin Evropian. Jemi të përkushtuar të arrijmë rezultate të tjera dhe të forcojmë Unionin, duke pasur parasysh ndryshimet gjeostrategjike që po ndodhin në nivel global.

Në këtë kontekst ndërkombëtar, hapja e negociatave për grupkapitullin e 6-të ka një rëndësi strategjike. Ajo çon një sinjal gjeostrategjik dhe është një njohje e qartë e harmonizimit të Shqipërisë me politikat e BE-së si një partner i qëndrueshëm dhe i vlefshëm.

Duke hapur kapitujt për këtë temë, ne flasim për marrëdhëniet me jashtë. Këto zhvillime forcojnë paqen, stabilitetin dhe sigurinë në BE dhe në kufijtë e Bashkimit Evropian, ku Shqipëria vepron si një aktor i rëndësishëm përkrah BE-së,” tha Kos.

LEXONI GJITHASHTU:

• Rama në Bruksel: Ambicia jonë është anëtarësimi në BE brenda 2030
• Konferenca ndërqeveritare Shqipëri-BE, Szijjártó: Shqipëria, progres të paprecedentë