Haxhiu dhe Bushati debatojnë nëse ishte e drejtë hyrja e Berishës në selinë e PD

Analisti Baton Haxhiu tha në emisionin “Shock” se Partia Demokratike është “kalaja që duhet pushtuar” dhe se ky është qëllimi i foltores së Berishës.

Për këtë, ai tha se thyerja e dyerve nga një mbështetës i Sali Berishës ishte e pritshme.

“Kjo mënyrë e të marrit të gjërave i pëlqen Berishës, molotovi, protesta, dhuna”, tha Haxhiu.

Baton Haxhiu tha se simbolika e sotme e thyerjes së derës duhet të ishte nga ai që e ka nisur revolucionin, pra Sali Berisha dhe jo persona të tjerë.

Ndërsa, analisti Andi Bushati tha se Sali Berisha është shumicë në Partinë Demokratike dhe mbështetësit e tij duhet të kenë të drejtë ta përdorin selinë e PD-së.

“Kjo seli, është selia personale e familjes Basha, apo e opozitarizmit shqiptar?”, tha Andi Bushati.

Ditën e sotme, Sali Berisha dhe mbështetësit e tij hynë për herë të dytë në selinë e PD-së, ku këtë herë u detyruan të thyejnë derën për të përdorur sallën e mbledhjeve për shkak se bravat e dyerve rezultojnë të jenë ndryshuar.