Haxhiu: Ideja e bashkimit është aq e vonshme sa është e turpshme

Gjatë diskutimit se a duhet një bashkim kombëtar mes Shqipërisë dhe Kosovës, në emisionin “Shock”, analisti Baton Haxhiu tha se një iniciativë e tillë është aq e vonshme sa është e turpshme.

“Është aq i vonshëm sa i ka mbetur gjeneratave tona të mendojmë se cila është rruga për bashkimin. Është aq i vonshëm sa është i turpshëm”, tha Haxhiu.

Duke iu përgjigjur analistit tjetër në studio, Andi Bushatit, Haxhiu tha se pajtohet se mungesa e demokracisë në të dyja vendet dhe problemet serioze e mosnjohjes së njëri tjetrit kanë bërë që mos të ketë gatishmëri për bashkim kombëtar.

Mirëpo, Haxhiu shton se të dyja vendet sillen si vende feudale.

“Për faktin se të dyja vendet funksionojnë si feude politike, nuk i jap të drejtë (Bushatit), për arsye së nuk është bërë asnjë përpjekje që të ndërtohen politika të cilat na ofrojnë. E gjitha ideja e bashkimit është ose brenda Bashkimit Evropian, për arsye se nuk dëshirojnë shqiptarët këndej e andej që të bëjnë një përpjekje që të bëjnë vetë diçka”, tha Haxhiu.

Ai tha se shqiptarët duan të jenë pjesë e Bashkimit Evropian sepse “vetë nuk kanë fuqi, nuk kanë dije, vetë nuk projekt dhe vetë nuk kanë dëshirë”.