Haxhiu: Rama kërkon që të ketë përplasje brenda opozitës për presidentin e ri

Analisti Baton Haxhiu thotë se kryeministri Edi Rama e ka mundësinë për ta zgjedhur vetë presidentin, por kërkon që të ketë një përplasje brenda opozitës, lidhur me këtë çështje.

Në emisionin “Shock” në “Euronews Albania”, Haxhiu u shpreh se Rama po e vendos opozitën në një situatë shumë të vështirë.

“Rama e ka mundësinë e zgjedhjes së presidentit, e ka idenë se edhe kush mund të jetë. Por, a e do një përplasje të opozitës edhe për këtë çështje? E do. A e do që ta vendosë në opinion publik dhe të ndërkombëtarëve që këta ende nuk mund të jenë si grup parlamentar me një komunikim për një çështje kaq të rëndësishme? E bën. Mendoj që opozitën po e vendos në një situatë shumë të vështirë”, tha Haxhiu.

Sipas tij, Rama ka strategji dhe do të djegë edhe raundin e dytë e tretë, për ta zgjedhur më pas vetë Kreun e Shtetit.

Ndërsa, analisti Andi Bushati deklaroi se dështimi i raundit të parë për votimin e presidentit, vjen për shkak se Rama nuk kërkon një proces konsensual.

“Ka dështuar për një arsye shumë të thjeshtë. Kushtetua e Shqipërisë e ka që presidenti në tre raundet e para nga pesë që janë gjithsej duhet zgjedhur me 3/5-tat. Nuk ka njeri që ka dy pare mend në kokë, që mendon që Edi Rama do shfrytëzojë instrumentin e shumicës së cilësuar. Edi Rama do të zgjedhë një president vetë dhe prandaj ka shkuar sot drejt dështimit të seancës së parë”, tha Bushati.

Këtë të hënë ka dështuar raundi i parë për zgjedhjen e Presidentit të Republikës. Në seancën plenare nuk u paraqit asnjë kandidaturë, ndaj dhe nuk pati votim.

LEXONI GJITHASHTU

• Rama: Nëse nuk ka konsenus, e zgjedhim vetë presidentin në raundin e katërt
• Presidenti duhet të zgjidhet në tre raundet e para, sipas Alibeajt
• Dështon raundi i parë për zgjedhjen e presidentit