Haxholli: 300 qytetarë të Kosovës të bllokuar në Serbi, hakmarrje për votimin në KiE

Fatmir Haxholli, sekretari i parë në Zyrën Ndërlidhëse të Republikës së Kosovës në Serbi, është shprehur se në hakmarrje të votimit të Asamblesë Parlamentare në Këshillit të Europës pro anëtarësimit autoritetet kufitare të Serbisë në pikëkalimin ‘Batrovci’ Serbi – Kroaci, po mbajnë të bllokuar së paku 4 autobus me targa dhe udhëtarë të Republikës së Kosovës.

Përmes një reagimi në rrjetet sociale, ai tha se bëhet fjalë për rreth 300 qytetarë të bllokuar, të cilëve sipas tij, u kanë mbajtur edhe pasaportat.

Ai tha gjithashtu se Zyra Ndërlidhëse serbe nuk po komunikon me Zyrën në Kosovë dhe shtoi se ka kërkuar që të shkojë vetë në Batrovci dhe të shohë situatën nga afër.

Reagimi i Haxhollit:

Në hakmarrje dhe nervozizëm absurd ndaj votimit të Asamblesë Parlamentare të Këshillit të Evropës, për anëtarsimin e Republikës së Kosovës në këtë institucion ndërkombëtar, autoritetet kufitare të Serbisë, në pikëkalimin ‘Batrovci’, Serbi – Kroaci, nga mesnata po i mbajnë të bllokuar së paku katër autobus me targa dhe udhëtarë, qytetarë të Republikës së Kosovës.

Bllokimi i mbi rreth 300 qytetarëve, duke ua mbajtur pasaportat dhe dokumentacionet e udhëtimit, është shkelje flagrante jo vetëm e marrëveshjeve të Brukselit, por edhe e të drejtave universale të njeriut të garantuara me të gjitha konventat ndërkombëtare. Vetëm regjimet më autoritare i bllokojnë udhëtarët e një vendi tjetër, me shpjegimin ‘ky është një urdhër nga Beogradi’.

Duke qenë që Zyra Ndërlidhëse serbe nuk po komunikon me Zyrën tonë, siç ndodhi edhe këtë mëngjes, kam kërkuar dhe jam në pritje të përcjelljës së afërt, që të udhëtoj drejt pikëkalimit Batrovci, për t’ju gjetur pranë bashkëqytetarëve tanë dhe në shenjë proteste ndaj këtij zhvillimi.

LEXONI GJITHASHTU:

• Basha nga KiE: Serbia kreu sulm paraushtarak në veri të Kosovës, skenar si i Krimesë
• Rohde: Kosovën e pret “punë e vështirë” për t’u anëtarësuar në KiE në maj