Heshtja për çështjen Berisha, Bushati: Basha po luan rolin e strucit, kjo është e pafalshme

Analisti politik Andi Bushati tha në “Shock” se heshtja e Bashës për shpalljen “non grata” të ish-kryeministrit Sali Berisha nga SHBA ka shkaktuar çudi të madhe tek njerëzit.

Ai thotë se Basha ka zgjedhur qasjen më të gabuar dhe po luan atë që e cilësoi si “politika e boshit”.

“Ka kohë që njerëzit e presin me çudi mungesën e Bashës për të mbajtur një qëndrim rreth çështjes Berisha. Për mua është qasja më e gabuar. Kush lë një vend bosh zëvendësohet nga personazhe dhe ide të tjera. Basha po luan “politikën e boshit” dhe kjo është gabim.”, tha ai.

Madje për Bushatin kryetari aktual i PD-së po luan” rolin e strucit” dhe kjo është e pafalshme.

“Politika e një lideri mund të ketë qëndrime të qarta. Basha thjesht po fshihet dhe po luan rolin e strucit. Të mbajë çfarëdo qëndrimi të dojë, por nuk ka lider, që ka luksin që të mos ketë qëndrim, kjo është e pafalshme”, tha ai.