Historia e blegtorit të fundit në fshat, mbarështon bagëti për të mbijetuar

Në fshatin Thanë të Elbasanit, mes tokave që po mbeten të braktisura dhe shtëpive bosh, Ferit Lamçja është i vetmi që ende merret me blegtori. 72-vjeçari kujdeset çdo ditë për mbi 100 bagëti të imta dhe dy lopë, në një kohë kur thuajse gjithë të rinjtë janë larguar.

“Jam marrë me këtë punë që i vogël. I ka pasur edhe babai, më pas i mbajta vetë. Kam 103 krerë dele dhe dy lopë. Por të kujdesesh për to është e vështirë, sidomos kur je vetëm. Këto nuk e dinë se je i sëmurë apo i lodhur, duan të dalin çdo ditë”, tha Ferit Lamçja, blegtor.

Feriti tregon se dikur edhe ai provoi emigrimin, por u kthye shpejt në Shqipëri për të qenë pranë familjes. Sot, ai thotë me keqardhje se është i vetmi që ka mbetur në fshat me tufë të tillë, pasi të rinjtë nuk e duan më këtë punë.

“Aq keq sa s’di si ta shpjegoj. Pata nipin këtu, por vitin e kaluar iku në Gjermani. Kur e çoja me delet, ai thoshte më mirë të vritej sesa të rrinte me to. Nuk i duan të rinjtë, janë të mërzitshme, duan durim të madh”, tha ai.

Megjithatë, shpërblimi nga kjo punë është i sigurt, edhe pse jo i mjaftueshëm për të tërhequr brezin e ri, thekson Lamçja.

“Unë shes qingjat me 5 apo 6 mijë lekë. I marrin kasapët që kanë dyqane dhe i shpërndajnë në lokale. Mishi ecën, por nuk është punë që e bën çdo kush”, përfundoi Ferit Lamçja.

Banorët e zonës e njohin si të vetmin blegtor që sot ka ende 103 dele, një dëshmi e gjallë e një tradite që po shuhet bashkë me brezat që ikin.

LEXONI GJITHASHTU:

• Zjarr në pyllin mbi fshatin Miras të Devollit, forcat e zjarrfikësve në terren
• Bie prodhimi i energjisë nga HEC-et në pranverë, rritet nga panelet diellore