Honda largohet nga Formula 1 vitin e ardhshëm

Honda, partneri kryesor i Red Bullit në Formulën 1, ka njoftuar se do të tërhiqet nga garat e njëvendëshes në fund të këtij sezoni.

Deklarata e largimit të markës japoneze e lë skuadrën Red Bull, e cila ka si ekip të dytë edhe Alpha Taurin, pa furnitorë për motorë.

Kompania tha se largimi nga Formula 1 vinte për shkak të ndryshimit të fokusit kryesor në industrinë e makinave, nga makinat me motorë me djegie të brendshme te ato me energji të ripërtërijshme. Gjë për të cilën ajo është shprehur se kërkon rikonceptim të ndarjes së burimeve ekonomike dhe njerëzore.

Deri në vitin 2050 Honda synon të arrijë “neutralitetin e emetimit të karbonit” duke përmirësuar modelet e motorëve me risi teknologjike, risi të cilat përfshijnë edhe përdorimin e baterive.

Red Bull u shpreh se mbetet e përkushtuar për të vazhduar përfshirjen në garat e Formulës 1, zotim ky i konkretizuar me marrëveshje bashkëpunimi muajin e shkuar.

Për herë të parë Honda mori pjesë në Formulën 1 në vitet 1964-68, më pas u rikthye për një dhjetëvjeçar në vitet 1980-1990 ku bashkëpunojë me Williams, Tyrrell dhe McLaren.

Me këta të fundit pati një bashkëpunim të gjatë pas vitit 2005, por që rreth pesë vite më parë u prish me shumë debate pasi McLaren e akuzoi hapur se nuk i mundësonte motorë konkurrues.

Në sezonin aktual Red Bull-Honda mban vendin e dytë për konstruktorë me 192 pikë, plot 174 larg Mercedesit, që prej vitesh mbetet e pakonkurrueshme.