Humbje surprizë për Barcelonën, Real Madrid merr kreun e La Ligës

Barcelona ka pësuar humbjen e katërt në La Liga, një disfatë që i ka kushtuar kreun e klasifikimit. Tashmë në vendin e parë renditet Real Madrid, me dy pikë më shumë. Ndeshja e së hënës u mbyll 2-1 në favor të Girona FC.

Katalanasit nuk ishin në mbrëmjen e tyre më të mirë dhe u ndëshkuan nga një Girona e vendosur, që nuk e lejoi kundërshtarin të zhvillonte lojën e zakonshme.

Në 45 minutat e para, miqtë u shfaqën më kërkues dhe krijuan disa raste të mira shënimi. Më i pastri erdhi në shtesë, kur Lamine Yamal gaboi nga pika e bardhë e penalltisë.

Në fraksionin e dytë, Pau Cubarsí kaloi Barcelonën në avantazh, duke dhënë përshtypjen se miqtë do ta administronin rezultatin. Megjithatë, reagimi i Gironës ishte i menjëhershëm. Fillimisht barazoi Lemar në minutën e 61-të, ndërsa në fundin e takimit Beltran realizoi golin e përmbysjes për vendasit.

Pjesa e dytë ishte më e luftuar dhe me ritëm të lartë, me Gironën që u tregua më konkrete në momentet vendimtare, duke siguruar tri pikë të arta.

Barcelona regjistron kështu humbjen e katërt në 24 javë kampionat dhe renditet në vendin e dytë me 58 pikë, dy më pak se kryesuesit e rinj, Real Madrid.