Hyn në fuqi në BE, më shumë mbrojtje për gazetarët dhe transparencë për mediat

Akti për Lirinë e Medias në Bashkimin Evropian hyri në fuqi, me synimin për të ofruar një mbrojtje më të mirë për shtypin dhe për ta bërë pronësinë e medias më transparente.

Ligji synon gjithashtu të kufizojë përdorimin e programeve elektronike të spiunazhit ndaj gazetarëve, të forcojë transparencën e reklamave dhe atë të pavarësisë së mediave publike.

Rregullat e reja do të mundësojnë gjithashtu që gazetarët të jenë më të mbrojtur dhe bashkë me ta edhe burimet e tyre.

Edhe rrjetet sociale duhet gjithashtu të përmbahen nga fshirja arbitrare apo kufizimi i përmbajtjeve të postuara nga mediat e pavarura.

Ligji u hartua nga Komisioni Evropian dhe u mbështet nga pjesa dërrmuese e Parlamentit Evropian në votën plenare të vitit të kaluar.

“Tani që ky akt hyn në fuqi, media dhe gazetarët në BE kanë garanci të paprecedent dhe qytetarët mund t’u besojnë lajmeve që jepen në bazë të fakteve dhe jo sipas agjendave politike apo ekonomike”, deklaroi komisioneri i BE për Demokracinë, Michael McGrath.

Komisioni Evropian propozoi rregullat e reja përballë rënies së lirisë së medias në shumë shtete anëtare dhe asaj të sigurisë së gazetarëve, kryesisht në Hungari, Poloni dhe Greqi.

Gjithashtu, gazetarja investigative Daphne Caruana Galiza në Maltë dhe reporteri Jan Kuciak në Sllovaki u vranë për shkak të punës së tyre në 8 vitet e fundit.

LEXONI GJITHASHTU: 

• Media italiane: Ivanka Trump blen ishullin e Sazanit për 1 miliard dollarë
• Mediat britanike: Pushtimi i plotë i Gazës do të sillte rreziqe strategjike të mëdha