I dënuar me 20 vite burg në Itali, arrestohet në një hotel në Durrës Alket Hatija

Një 50-vjeçar i dënuar nga autoritetet gjyqësore italiane, për trafikim të lëndëve narkotike, është arrestuar në një hotel në Durrës, në kuadër të operacionit policor të koduar “International”.

Alket Hatija, 50 vjeç, ishte shpallur në kërkim ndërkombëtar nga Interpol Roma, pasi Gjykata e Apelit në Milano e ka dënuar atë, me 20 vjet burgim, për veprën penale “Trafikimi i lëndëve narkotike”, parashikuar nga Kodi Penal italian.

Sipas policisë Hatija në bashkëpunim me 40 persona të tjerë, ka trafikuar sasi të mëdha heroine në drejtim të Italisë gjatë periudhës 2003-2004.

30-vjeçar asokohe, Hatija dhe bashkëpunëtorët e tij përdornin automjete të transportit ndërkombëtar, për të fshehur sasi deri në 10 kg heroinë dhe për ta transportuar nga Shqipëria drejt Italisë.

“Në vijim të operacioneve të njëpasnjëshme për kapjen dhe arrestimin e shtetasve në kërkim kombëtar apo ndërkombëtar, bazuar në informacionet e siguruara nga inteligjenca informative, nga strukturat e DVP Durrës, në bashkëpunim me Interpol Tiranën, është organizuar dhe finalizuar operacioni policor i koduar “International”, për kapjen e një shtetasi të shpallur në kërkim ndërkombëtar.

Gjatë këtij operacioni, është kapur nga shërbimet e Forcës së Posaçme Operacionale, shtetasi:  Alket Hatija, 50 vjeç”, njofton policia.