I dënuar me 24 vite burg për vrasje në vitin 1999, arrestohet në Angli 60-vjeçari i shumëkërkuar shqiptar (EMRI)

Një shqiptar i shpallur në kërkim ndërkombëtar është vënë në pranga nga policia britanike. Arrestimi i tij ka ardhur pas një operacioni ndërkombëtar në Angli. Policia bën me dije se 60-vjeçari Sabri Sopoti është dënuar nga Gjykata e Dibrës me 24 vite burg për vrasje me paramendim.

Ngjarja ka ndodhur në dhjetor të vitit 1999 ku Sopoti vrau me armë një person. Policia thekson se po vijon punën për ekstradimin e tij në Shqipëri.

“Policia e Shtetit/ Finalizohet në bashkëpunim me Policinë britanike, një tjetër fazë e operacionit ndërkombëtar, të koduar “The Ëanted”.

Lokalizohet, kapet dhe arrestohet në Angli, një shtetas i dënuar me 24 vjet burgim, për vrasje me paramendim.

Si rezultat i koordinimit informativ dhe operacional ndërmjet homologëve të Interpol Tiranës dhe Interpol Manchester, në kuadër të operacionit të koduar “The Ëanted”, u kap në Angli, me qëllim ekstradimin në Shqipëri, shtetasi i shpallur në kërkim ndërkombëtar, Sabri Sopoti, 60 vjeç.

Gjykata e Dibrës, e ka dënuar këtë shtetas, me 24 vjet burgim, për veprat penale “Vrasja me paramendim” dhe “Mbajtja pa leje dhe prodhimi i armëve, armëve shpërthyese dhe i municionit”.

Më datë 24.12.1999, shtetasi Sabri Sopoti ka vrarë me armë zjarri (automatik), shtetasin B. K.

Interpol Tirana vijon bashkëpunimin me Interpol Manchester, me qëllim ekstradimin e 60-vjeçarit, në Shqipëri”, njofton policia.