I kërkoi rezultatet e marra prej tij si deputet gjatë 30 viteve, KQZ i kthen përgjigje Braçes

Komisioni Qendror i Zgjedhjeve i është përgjigjur deputetit të PS, Erion Braçes në lidhje me kërkesën e tij ku kërkon t’i vihen në dispozicion të gjitha rezultatet e marra prej tij si deputet.

Në shkresën e kthimit të përgjigjes nga KQZ thuhet se vendoset në dispozicion Erion Braçes rezultatet personale nga viti 2001 deri në 2021.

Ndërkohë sa i përket rezultateve të zgjedhjeve për Kuvend të viteve 1996 dhe 1997, KQZ nënvizon se iu janë drejtuar zyrtarisht Arkivit Qendror Shtetëror i cili thotë se këto dokumente nuk gjenden në fondin e tyre arkivor. Sipas shkresës ‘rezultatet e zgjedhjeve për këto dy vite administrohet në arkivin e Kuvendit të Shqipërisë’.

Kërkesa për rezultatet e zgjedhjeve nga deputeti socialist erdhi vetëm pak ditë përpara se ai të shprehte dëshirën për të kandiduar për kryetar të bashkisë se Tiranës në zgjedhjet e vitit të ardhshëm.