I përfshirë në disa vepra të rënda penale, arrestohet i dënuari me 10 vite burg

Një 27-vjeçar, i dënuar me 10 vite burg, është arrestuar mbrëmjen e së premtes nga policia e Durrësit. Uniformat blu bëjnë me dije se i riu u kap në vendin e njohur si Kryqëzimi i Fllakës.

Ai ishte shpallur në kërkim kombëtar pasi Gjykata e Apelit të Juridiksionit të Përgjithshëm Tiranë e ka dënuar me 10 vite burg për veprat penale “Prodhim dhe shitja e narkotikëve,” “Shfrytëzim i prostitucionit,” “Nxitje për përdorim të drogës” dhe “Drejtim automjeti në mënyrë të parregullt.”

Mësohet se të riut i kanë mbetur për të vuajtur edhe 5 vite e 4 muaj burg. Materialet hetimore i kaluan Prokurorisë për veprime të mëtejshme procedurale.

“Komisariati i Policisë Durrës, në bashkëpunim me Forcën e Posaçme ‘Shqiponjat’, në vijim të punës për kapjen e shtetasve të shpallur në kërkim, bazuar në inteligjencën policore mbi vendndodhjen e një shtetasi në kërkim, kanë organizuar dhe finalizuar operacionin policor të koduar ‘Kryqëzimi. Gjatë operacionit, shërbimet e Policisë kanë kapur te Kryqëzimi i Fllakës, në Durrës, shtetasin A. B., 27 vjeç, banues në Krujë,” thuhet mes të tjerash në njoftimin e policisë.

LEXONI GJITHASHTU:

• Humbet jetën 61-vjeçari, u aksidentua në pikën e përpunimit të inerteve
• Reklamonin vaj ulliri bio dhe shisnin përzierje me vajra të panjohur, arrestohen