I shpallur në kërkim për skandalin e mikrokredive, arrestohet përmbaruesi gjyqësor

Një përmbarues i shpallur në kërkim për skandalin e mikrokredive është arrestuar nga policia.

Gjykata kishte caktuar masën e sigurisë “arrest me burg” në mungesë për përmbaruesin gjyqësor Alban Kote i akuzuar për shpërdorim detyre.

“Specialistët e Sektorit për Hetimin e Krimit Ekonomik dhe Financiar ekzekutuan vendimin penal për shtetasin A. K., 43 vjeç, banues në Tiranë, pasi Gjykata e Shkallës së Parë e Juridiksionit të Përgjithshëm Tiranë i ka vendosur masën e sigurimit personal “Arrest në burg” për veprën penale “Shpërdorimi i detyrës”, bëri me dije policia.

Prokuroria e Tiranës sekuestroi disa muaj më parë llogari bankare në vlerë 10 mln euro të administratorëve që u përfshinë në skemën e mashtrimit të kredive. Paratë i përkasin 10 personave dhe tre subjekteve, ‘MCA”, “ADCA” dhe ‘Final’ shpk.

9 persona, administratorë dhe përmbarues nga institucionet financiare Micro Credit Albania, ADCA, si dhe shoqërive përmbaruese Zig, FS, FLASH, u arrestuan.

Grupi dyshohet se është përfshirë në skema mashtrimi në dëm dhjetëra mijëra qytetarëve, të cilët kishin marrë kredi. Në total bëhet fjalë për 10 milionë euro, ndërsa akuza e ngritur ndaj tyre është ajo e “pastrimit të parave”.

LEXONI GJITHASHTU:

• Begaj letër Kuvendit për skandalin e mikrokredive: Ka nevojë për reagim të fortë
• Rregullat e reja për mikrokreditë: Klientët do përzgjidhen, sa do jenë interesat