Ibrahimaj tregon detaje nga mbledhja e Këshillit të Sigurisë për sulmet kibernetike

Ministrja e Ekonomisë dhe Financave Delina Ibrahimaj u shpreh për Euronews Albania se sot në mbledhjen e Këshillit të Sigurisë diskutuan për sulmet kibernetike, ku raportoi secili institucion.

“Në fakt është roli i presidentit që të thërrasë komitetin e sigurisë kombëtare për çështje të ndryshme. Diskutuam për çështjet e momentin për sulmet kibernetike. Çdo institucion raportoi mbi masat e marra, mbi nivelin e goditjes dhe mbi masat që do të merren në vijim me qëllim përballimin e situatës”, u shpreh ministrja pas mbledhjes së qeverisë.

Sot u mbledh Këshilli i Sigurisë për sulmet kibernetike, ku i pranishëm ishte edhe kryeministri Edi Rama.

Këshilli i Sigurisë përbëhet nga 14 anëtarë dhe kryesohet nga Presidenti i Republikës.

Anëtarët e tjerë të tij janë kryetari i Kuvendit, kryeministri, 7 ministra—i Mbrojtjes, Drejtësisë, Punëve të Brendshme, Financave, Transportit, Punëve të Jashtme dhe Energjisë.

Anëtarët janë edhe Kryetari i Komisionit Parlamentar të Sigurisë Kombëtare, Drejtori i Shërbimit Informativ Shtetëror dhe Drejtori i Përgjithshëm i Policisë.

Ligji i jep të drejtën Presidentit të “ftojë pjesëmarrës të tjerë” në mbledhjet e Këshillit, por që nuk gëzojnë të drejtat e anëtarëve.

Për herë të fundit, Këshilli i Sigurisë Kombëtare është mbledhur nga ish-presidenti Ilir Meta në 14 shkurt 2022, për shkak të tensioneve Rusi-Ukrainë.

LEXONI GJITHASHTU:

• Dy ministrat që mungojnë në mbledhjen e Këshillit të Sigurisë
• Sot në orën 11:00 mblidhet Këshilli i Sigurisë, i pranishëm kryeministri Rama
• Presidenti Begaj mbledh sot Këshillin e Sigurisë për sulmet kibernetike