Inceneratori i Tiranës: GJKKO jep dënimin për Alqi Bllakon

Gjykata e Posaçme Kundër Korrupsionit dhe Krimit të Organizuar dha këtë të martë vendimin për ish-sekretarin e përgjithshëm të Ministrisë së Mjedisit, Alqi Bllako, duke e dënuar me 4 vite burg për korrupsion pasiv në dy raste, në lidhje me çështjen e inceneratorit të Tiranës.

Duke përfituar nga gjykimi i shkurtuar, dënimi i tij përfundimtar u reduktua në 2 vite e 8 muaj burg.

Prokuroria e Posaçme Kundër Korrupsionit dhe Krimit të Organizuar kishte kërkuar një dënim prej 5 vitesh e 4 muajsh për Bllakon, i cili me gjykim të shkurtuar do të zbriste në 3 vite e 4 muaj.

Episodet për të cilat u shpall fajtor Bllako janë përfitimi i një pagese prej rreth 120 mijë euro nga Klodian Zoto për një pajisje për fabrikën e birrës të të atit, Edmond Bllako, dhe një shumë tjetër prej 7.5 milion lekësh në formë pagese te ish-këshilltar i jashtëm të Lefter Kokës, Vladimir Bezhanit, nga kompanitë e inceneratorëve.

Bllako është dënuar më herët me vendim të formës së prerë për inceneratorin e Elbasanit me 2 vite e 8 muaj, ndërsa për inceneratorin e Fierit, çështja u rikthye për rigjykim nga Apeli në Shkallën e Parë.

LEXONI GJITHASHTU:

• Pafajësia e Bllakos dhe dënimi për Kokën, SPAK kundërshton vendimet për “Elbasanin”
• SPAK kërkon në Apelin e Posaçëm ndryshimin e vendimit për Bllakon dhe Kokën