Incident në Himarë! Plagoset një 35-vjeçar pasi bie nga gomonia, shkak shpejtësia e lartë. Policia Kufitare ndalon mjetin

Një incident është shënuar këtë të shtunë në detin e Himarës. Sipas njoftimit paraprak, është pikasur nga Policia Kufitare e Himarës një gomone e cila lëvizte në mënyrë të pakontrolluar dhe me shpejtësi, në të cilën nuk kishte njeri në bord.

Sipas raportimeve të policisë, gomonia i përkiste shtetasit E. M., 35 vjeç, i cili kishte rënë në det gjatë lëvizjes së shpejtë dhe kishte dalë në gjirin e Llamanit i dëmtuar në këmbë. Ai është transportuar në spital dhe ndodhet jashtë rrezikut për jetën.

 “Ndërhyrja e menjëhershme e shërbimeve të Policisë Kufitare në Himarë shmangu sot një ngjarje me pasoja të rënda në det.

Pas njoftimit se një gomone po lëvizte në mënyrë të pakontrolluar dhe me shpejtësi, pa persona në bord, shërbimet e Policisë Kufitare ndërhynë menjëherë në zonën e “Kepit të Rigonit”, përballë plazhit të Llamanit.

Nga verifikimet rezultoi se drejtuesi i mjetit lundrues, shtetasi E. M., 35 vjeç, banues në Orikum, kishte rënë në det gjatë lëvizjes dhe kishte dalë në gjirin e Llamanit, i dëmtuar në këmbë. Ai u transportua në spital për ndihmë mjekësore dhe ndodhet jashtë rrezikut për jetën.

Gomonia, e cila paraqiste rrezik për mjetet e tjera lundruese dhe për pushuesit, u vu nën kontroll nga Njësia Policore Detare dhe Policia Kufitare. Një punonjës i Njësisë Policore Detare mundi të hidhej në bordin e gomones dhe ta ndalonte atë.

Më pas, mjeti lundrues u tërhoq në PKK Himarë për verifikime të mëtejshme.

Policia Kufitare vijon të jetë e angazhuar maksimalisht në shërbim të qytetarëve, vizitorëve dhe turistëve. Në këtë kuadër, ajo fton qytetarët që, në rast nevoje, të telefonojnë në numrin 112”, thuhet në njoftimin e policisë.