Përplasje në Durrës, ndërpritet votimi në shkollën “Naim Babameto”

Në Bashkinë e Durrësit ka ndodhur një incident në shkollën “Naim Babameto” e cila është kthyer në një qendër votimi ditën e sotme.

Simpatizantë të Partisë Socialiste kanë shqetësuar komisionerët e koalicionit “Bashkë fitojmë”. Këta të fundit kanë ngritur shqetësimin e tyre pranë policisë së qarkut të Durrësit. Ata e kanë cilësuar praninë e këtyre simpatizantëve si kërcënim për qytetarët.

Forcat e policisë u vendosën në dispozicion pasi për disa minuta veç pezullimit të voti9mit në këtë zonë, u ndalua edhe qarkullimi.

“Rreth orës 10:30, Komisioni i Qendrës së Votimit 1428-2, KZAZ Nr. 24, Durrës, bazuar në urdhrin nr. 62, të datës 03.05.2023, të Komisionerit Shtetëror të Zgjedhjeve,  me vendimin numër 13, ka kërkuar ndihmë nga Policia e Shtetit, për të larguar disa shtetas të paautorizuar që qëndronin në këtë Qendër Votimi dhe rrezikonin zhvillimin e rregullt të procesit të votimit.

Shërbimet e Policisë, me marrjen e vendimit, kanë shkuar menjëherë në këtë Qendër Votimi dhe kanë larguar nga ambientet e kësaj Qendre, personat e paautorizuar dhe ata që pengonin zhvillimin e rregullt të procesit të votimit.

Po me vendim të Komisionit të Qendrës së Votimit, pas normalizimit të situatës, punonjësit e Policisë janë larguar nga Qendra e Votimit.

Ndërkohë, në Komisariatin e Policisë Durrës është paraqitur shtetasi H. M., i cili ka deklaruar se gjatë kohës që ka qenë në korridorin e Qendrës së Votimit 1430-2, Durrës, e kanë goditur me grushte shtetasit D. B., P. P. dhe N. P.

Specialistët për Hetimin e Krimeve të Komisariatit të Policisë Durrës kanë njoftuar menjëherë prokurorin e gatshëm, për këtë rast.

Në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Durrës, po vijojnë veprimet hetimore për zbardhjen e plotë të rrethanave të këtij rasti.

Shërbimet e Policisë po punojnë për kapjen dhe shoqërimin e këtyre 3 shtetasve”,-thuhet në njoftimin e policisë.

LEXONI GJITHASHTU:

• Evis Kushi voton në Elbasan: Kjo do jetë dita më e bukur
• Voton Berisha: Pranvera e ndryshimit! Nesër merr fund monizmi i shëmtuar