Inflacioni në Shqipëri është dyshifror, sipas ekspertit të ekonomisë

Eksperti i ekonomisë, Gent Beqiri thotë se inflacioni në Shqipëri është dyshifror, bazuar në ndryshimin vjetor të indeksit të çmimeve të konsumit, ku në prill 2022 ishte 6.2%, nga 1,9% për të njejtën periudhë të një viti më parë.

Në emisionin “Mirëmëngjes” në “Euronews Albania”, Beqiri tha se përveç rritjes së çmimeve kemi edhe përkeqësim të produkteve që ofrohen në treg.

“Unë jam i sigurt që inflacioni te ne është dyfishror. Nuk kemi vetëm rritje të çmimeve por edhe përkeqësim të asaj që ofrohet. Rasti për shembull me bukën. Nuk ka pasur vetëm një rritje të çmimt të bukës por edhe ulje të gramaturës. Ky është një problem dhe mund të ketë ndodhur edhe me produkte të tjera të shportës”, u shpreh eksperti.

Sipas tij, Shqipëria nuk ka ndërtuar një ekonomi konkuruese tregu por një ekonomi kaos.

Beqiri shtoi se Bordi i Transparencës nuk mund të fiksojë çmimet e produkteve në treg, pasi ato vijnë në vend nga importues të ndryshëm dhe me cilësi e çmime të ndryshme.

Sipas një raporti të publikuar nga INSTAT pak ditë më parë, faturat për transport dhe ushqime vazhduan të shtrenjtohen edhe në muajin prill, duke e çuar inflacionin në 6.2%.

Kjo është rritja më e madhe e çmimeve, që nga viti 2001, rritje e cila do shoqërojë familjet shqiptare edhe në fillim të vitit 2023.

LEXONI GJITHASHTU

• Inflacioni në prill arriti 6,2%, niveli më i lartë që nga viti 2001
• Pasiguritë e fermerëve, investimet të rrezikuara nga rritja e çmimeve