INSTAT: 8,9 milion vizita të kryera në 2024, mbi 299 mijë u shtruan në spital

Mjekët e familjes në të gjitha poliklinikat e vendit kanë kryer mbi 8.9 milion vizita përgjatë vitit 2024.

Raporti i hartuar nga ekspertët e statistikave mbi vizitat në ambulator dhe shtrimet në spital ka nxjerr në pah, se numri i vizitave tek mjeku i familjes është ulur me 3,1% krahasuar me vitin 2023. Të moshuarit janë frekunetuesit më të mëdhenj të këtij shërbimi. Ndërkohë sa i takon shtrimeve spitalore është parë që ato janë rritur me 4,8%.

Bazuar në të dhënat e raportit, gjatë një viti janë shtruar në spital 299.318 pacientë. Duke patur parasysh që shërbimi publik disponon 8.911 shtretër, u pa se shfrytëzimi i shtratit ishte 176,7 ditë, të cilat përbëjnë 48,4 % të ditëve kalendarike të vitit 2024.

Por ndryshe nga viti 2023, u pa se në 2024, pacientët kanë qëndruar mesatarisht 4,7 ditë në spital, kohë kjo më e shkurtër se 5 vitet e fundit.

Në shërbimin spitalor përgjatë një viti janë kryer gjithsej 65.302 ndërhyrje kirurgjikale, me një rritje prej 0,4 %, krahasuar me vitin 2023

Në të gjithë Shqipërinë numërohen 65 spitale, nga të cilët 41 janë publike dhe 24 spitale private.

LEXONI GJITHASHTU:

• Shembet ura që lidhte tre fshatra në zonën e Delvinës, izolohen banorët
• Vështirësi në qarkullim nga reshjet dhe mjegulla, trafik në aksin Elbasan-Librazhd