Interesim i lartë i emigrantëve për 11 majin, KQZ kërkon fond shtesë

Numri i emigrantëve të regjistruar për zgjedhjet e 11 majit deri mesditën e kësaj të martë i ka kaluar 181 mijë, duke bërë që pritshmëritë për pjesëmarrjen e diasporës në këtë proces, të jetë pothuajse i dyfishuar.

Kur kanë mbetur vetëm 8 ditë nga mbyllja e afatit të regjistrimeve, të gjitha palët politike i kanë intensifikuar takimet me diasporën, duke bërë që edhe ritmet e regjistrimeve në 48 orët e fundit të kenë qenë goxha të larta.

Në këto kushte, kur fondi i lëvruar për KQZ-në për këtë proces ka qenë i parashikuar për rreth 100 mijë emigrant, Komisioneri Shtetëror i Zgjedhjeve i është drejtuar Kuvendit të Shqipërisë dhe Ministrisë së Financave për fond shtesë për votën e Diasporës dhe mbulimin e postës, sikurse edhe për shtim të stafit me punonjës në kuadër të zgjedhjeve parlamentare të 11 Majit.

Shuma totale për postën që duhet për votën e diasporës shkon në 12,5 mln euro. Nga të cilat 5 mln euro ka qenë fondi aktual dhe dhe 7,5 mln euro kërkohet që të shtohen.

KQZ kërkoi gjithashtu edhe 80 punonjës shtesë për Diasporën, pasi ritmi i aplikimeve deri më datë 4 mars pritet që ta kalojë shifrën e 320 mijë kërkesave për regjistrim.

LEXONI GJITHASHTU:

• Zgjedhjet e 11 majit, ku do bëhet votimi elektronik? Zbulohen 3 skenarët e KQZ
• Publikohen modelet e fletës së votimit për zgjedhjet e 11 majit