Interi jashtë planeve për Asllanin, Fiorentina tërhiqet nga gara

Kristjan Asllani duket se po përballet me një situatë të vështirë te Interi, me mesfushorin e Kombëtares shqiptare që është gjithnjë e më shumë jashtë planeve të klubit zikaltër. Kjo është konfirmuar edhe nga vetë drejtuesit e kampionëve të Italisë, të cilët deri më tani nuk kanë ndërmarrë asnjë hap konkret për të ndihmuar 22-vjeçarin që të gjejë një sistemim të ri.

Pas refuzimit të ofertës nga Real Betis  për shkak se dëshiron të qëndrojë në Serie A Asllani ishte lidhur me dy klube që shpresonin ta afronin në merkato, Fiorentina dhe Bologna. Të dyja skuadrat janë në kërkim të përforcimeve në mesfushë dhe e shihnin mesfushorin shqiptar si një alternativë cilësore për sezonin e ri.

Megjithatë, sipas raportimeve nga mediat italiane, Fiorentina është tërhequr nga interesimi për shkak të kërkesave të larta financiare të Interit. Zikaltrit kërkojnë një shumë prej 18 deri në 20 milionë euro për kartonin e Asllanit  një shifër që konsiderohet e papërballueshme në tregun aktual italian.

Tërheqja e klubit nga Firence e bën edhe më të kufizuar numrin e opsioneve për të ardhmen e Asllanit, ndërsa mbetet për t’u parë nëse Bologna do të bëjë lëvizjen e radhës për të siguruar shërbimet e tij.