Irani tregon forcën, mbyll përkohësisht Ngushticën e Hormuzit për stërvitje ushtarake

Irani njoftoi të martën mbylljen e përkohshme të Ngushticës së Hormuzit për stërvitje me armë zjarri, në një shfaqje të rrallë force, ndërsa negociatorët e tij zhvilluan një raund tjetër bisedimesh indirekte me Shtetet e Bashkuara mbi programin bërthamor të kontestuar të Republikës Islamike.

Ishte hera e parë që Irani njofton mbylljen e rrugës ujore ndërkombëtare kyçe, përmes së cilës kalon 20% e naftës botërore, që kur SHBA- të filluan të kërcënojnë Iranin dhe të dërgojnë me nxitim asete ushtarake në rajon. Nuk ishte menjëherë e qartë nëse ngushtica ishte mbyllur, por një veprim kaq i rrallë dhe ndoshta i pashembullt mund të përshkallëzojë më tej tensionet që kërcënojnë të ndezin një luftë tjetër në Lindjen e Mesme, shkruan Associated Press.

Ndërsa filluan bisedimet, media shtetërore e Iranit njoftoi se forcat iraniane kishin qëlluar me raketa drejt ngushticës dhe do ta mbyllnin atë për disa orë për “shqetësime sigurie dhe detare”.

Ndërkohë, udhëheqësi suprem, Ajatollah Ali Khamenei, paralajmëroi se “ushtria më e fortë në botë ndonjëherë mund të marrë një shuplakë të tillë sa të mos mund të ngrihet më në këmbë”.