Irlanda paralajmëron tërheqjen nga Eurovision 2026 nëse merr pjesë Izraeli

Transmetuesi publik irlandez RTÉ ka paralajmëruar se Irlanda nuk do të marrë pjesë në Festivalin Europian të Këngës në vitin 2026, nëse Izraeli vijon të jetë pjesë e kompeticionit.

Në një deklaratë zyrtare, RTÉ bëri të ditur se gjatë Asamblesë së Përgjithshme të Unionit Evropian të Transmetimeve (EBU), e mbajtur në korrik, disa vende anëtare ngritën shqetësime mbi pjesëmarrjen e Izraelit në Eurovision.

“Është qëndrimi i RTÉ që Irlanda nuk do të marrë pjesë në Festivalin e Këngës në Eurovision 2026, nëse pjesëmarrja e Izraelit vazhdon, dhe vendimi përfundimtar në lidhje me pjesëmarrjen e Irlandës do të merret pasi të merret vendimi i EBU-së”, thuhet në deklaratë.

RTÉ theksoi se pjesëmarrja e Irlandës “do të ishte e paarsyeshme duke pasur parasysh humbjen e vazhdueshme të jetëve në Gaza”, duke nënvizuar gjithashtu shqetësimet për “vrasjet e qëllimshme të gazetarëve, mohimin e aksesit për mediat ndërkombëtare dhe gjendjen e vështirë të pengjeve”.

Edhe transmetuesi kombëtar i Sllovenisë, RTVSLO, njoftoi se do të tërhiqet nga gara nëse Izraeli merr pjesë, ndërsa Ministri i Kulturës i Spanjës, Ernest Urtasun, paralajmëroi se edhe Madridi mund të bojkotojë festivalin.

Nga ana tjetër, përfaqësuesi i transmetuesit publik të Islandës, Stefan Eriksson nga RÚV, deklaroi se vendimi i tyre do të varet nga përgjigja e EBU-së, duke theksuar se “rezervojnë të drejtën të tërhiqen” nëse procesi i konsultimit nuk jep një rezultat të kënaqshëm.

Ky debat vjen pas një peticioni të nënshkruar nga mbi 70 ish-konkurrentë të Eurovisionit, të cilët këtë vit kërkuan përjashtimin e Izraelit nga gara.

LEXONI GJITHASHTU:

• Izraeli kundër Evropës: Do provoni terrorin në tokën tuaj nëse njihni Palestinën
• ANALIZA/ A është pushtimi i Gaza-s një manovër politike e Netanyahut?