Ish-dhjetoristi Blendi Gonxhe në NOW tregon çfarë ndodhi në 8 dhjetor ‘90

Blendi Gonxhe, ish-pjesëmarrës në protestën e dhjetorit 1990 tregon se lëvizja ka nisur nga Akademia e Arteve ku kishte një frymë më përparimtare.

Sipas Gonxhes ajo që doli jashtë parashikimit të sistemit ishte protesta për kushtet në konvikte.

“Në konvikte jeta ka qenë e vështirë nga pikëpamja higjienike, e ushqimit dhe të gjitha kushteve”, tha ai.

Gonxhe tregoi se fillimisht janë dhunuar gjatë protestave të para dhe ka pasur përpjekje për ta shfryrë protestën dhe vetëm pasi u krijua një masë e madhe prej 50 mijë vetash sistemi u detyrua të bënte lëshime.

Ish-studenti i dhjetorit tha se kishte shumë skenare për situatën e krijuar, madje dhe takimi me Ramiz Alinë ishte në një ambient të vështirë për ta.

Gjithashtu Gonxhe tha se “teknika” që përdorën ishte që Alia të merrte një mbështetje në mënyrë që të guxonte për të bërë sa më shumë lëshime.

“Mendonim që duke e ndarë Ramizin si President, donim që t’i jepnin mundësin që të merrte atë guxim që nuk e mori kurrë dhe që ndoshta të ishte pjesë shumë e mirë e historisë sonë”, tha ai.

Blendi Goxhe theksoi se ishin pikërisht ata që morën hapin për dhënien e mundësisë së parë për t’u larguar nga fryma komuniste.