Ish-luftëtarët e ISIS nga Maqedonia e Veriut

40 persona nga Maqedonia e Veriut prej të cilëve 23 janë fëmijë dhe 4 gra, për momentin ndodhen ende në vrullin e luftës në Siri. Aktualisht 13 meshkuj nga Maqedonia e Veriut janë duke luftuar në frontin e luftës pranë ISIS.  Sipas të dhënave që Ministria e Brendshme i bën të ditur Euronews Albania-s rreth 150 persona në total kanë marrë pjesë në luftën në Siri, nga Maqedonia e Veriut.

Zv. ministri i Brendshëm, Agim Nuhiu, thotë se shteti po punon për risocializimin e te kthyerëve nga Siria përmes institucioneve dhe programeve të ndryshme, edhe pse në vend nuk ekzistojnë kampe të veçanta apo strategji të unifikuara.

 “Megjithatë jam i informuar se ndaj tyre po zbatohen programe për trajtime multisegmentale, përfshirë

deradikalizimin e tyre, risocializimin, rehabilitimin e tyre. Ne nuk kemi themeluar kamp të veçantë, megjithatë kemi ngritur kapacitetet e të gjitha shërbimeve, qoftë të fushës së shëndetësisë, të ministrisë së brendshme, por edhe për trajtime të aspekteve sociale dhe në çdo moment u kemi ofruar ndihmën e nevojshme”. tha zv. ministri I brendshëm, Agim Nuhiu.

Sociologu Ali Pajaziti ka shprehur se shteti nuk ka zgjedhur metoda efikase për risocializimin e të kthyerëve dhe në të njëtën kohë as shoqëria civile nuk po bën aq sa duhet.

“Duhet të ketë kampe për risocializimin e tyre, për rikthim në rrjedhat normale të jetesës, që këta njerëz

të kapin ritmin e jetës, të mund të rikthehen nga ato skena, ato pamje dhe ajo katrahurë që kanë

përjetuar. Për fat të keq, shteti në këtë drejtim nuk po ndërmerr hapat e duhura, por edhe shoqëria civile nuk është aktive në këtë drejtim”. tha sociologu Ali Pajaziti.

Sipas të dhënave të siguruara nga Euronews Albania, 51 persona kanë qenë në luftë dhe janë kthyer

para vitit 2015, kur pjesëmarrja në luftërat e huaja në ligjet e vendit, nuk ishte sanksionuar si vepër penale.  

Ata nuk përndiqen nga ligji dhe nuk janë përfshirë në asnjë program risocializimi. Nga ana tjetër, rreth 23 persona janë dënuar në total pas vitit 2015.

Një pjesë e tyre janë të rikthyerit, ndërsa të tjerët janë shpallur përgjegjës për rekrutim dhe logjistikë brenda Maqedonisë së Veriut.