Italia goditet nga shirat dhe erërat e dendura, 6000 persona të izoluar nga ortekët

Një person ka humbur jetën nga stuhia e fortë që ka nisur prej ditësh në Itali, ndërsa reshjet e dendura të shiut dhe erërat e forta kanë vazhduar edhe sot.

Në fshatin Plan, në provincën e Trentino-Tirolit të Jugut, është vrarë një djalë 16-vjeçar dhe supozohet se ka vdekur pasditen e djeshme, raporton ANSA.

Familja e tij e ka denoncuar në polici të zhdukur mbrëmjen e djeshme, pasi i riu nuk është kthyer në shtëpi. Në kërkimin që nisi në orën nëntë të mbrëmjes, në dëborë u gjet një trup i pajetë. Mediat italiane raportuan më parë se në rajonin veriperëndimor alpin të Val d’Aosta, më shumë se 6000 njerëz, që jetojnë në pjesën e sipërme të luginës së Gressonit, janë izoluar që nga e diela për shkak të ortekëve.

Alarmi portokalli i motit është në fuqi në dy rajone – Emilia Romagna dhe Piemonte. Alarmi i verdhë i motit është në fuqi në 13 rajone italiane – Abruzzo, Basilicata, Kalabria, Campania, Molise, Puglia, Lacio, Lombardia, Sardenja, Siçilia, Toskana, Umbria dhe Veneto. Rrëshqitjet e dheut ndodhën në rajonin Liguria në veriperëndim të Italisë, në Genova dhe rrethinat e saj.

LEXONI GJITHASHTU:

• Në kërkim nga Gjermania për kokainë, prangoset në Itali 24-vjeçari shqiptar
• I zuri orteku i borës në Itali, humb jetën 1 person, 1 tjetër në gjendje të rëndë