Agjentët e infiltruar, sekuestrohen 4 tonë kokainë dhe 1.8 milionë euro

Autoritetet italiane thonë se kanë konfiskuar 4.3 tonë kokainë me një vlerë në treg prej më shumë se 200 milionë eurosh.

Sipas Guardia di Finanza kjo është një nga sasitë më të mëdha të drogës të kapur në Evropë dhe i ka dhënë një goditje klanit të frikshëm të Gjirit të Kolumbisë.

Kokaina u sekuestrua në portin e qytetit verilindor të Triestes, pas një hetimi njëvjeçar që përfshinte gjithashtu Departamentin e Sigurisë Kombëtare të SHBA dhe Policinë Kombëtare spanjolle.

Autoritetet kanë lëshuar gjithashtu 38 urdhër-arreste për trafik ndërkombëtar të drogës në Itali, Slloveni, Kroaci, Bullgari, Holandë dhe Kolumbi.

Operacioni i fshehtë dha një “goditje të fortë ndaj një prej grupeve më të rëndësishme kolumbiane të narkotikëve”, thanë në një deklaratë hetuesit italianë të antimafias.

Autoritetet përllogarisin se grupet kriminale paguan 96 milionë dollarë për kokainë që në tregun italian do t’u sillte atyre 240 milionë euro.

Si pjesë e operacionit, agjentë të policisë u infiltruan në grupet e trafikimit të drogës që veprojnë në Itali.

Bashkë me kokainën, agjentët gjithashtu sekuestruan 1.8 milionë euro cash.

Karteli “Klani i Gjirit” është një nga grupet më të mëdha kriminale në Kolumbi dhe që ka një rrjet të shtrirë në 28 vende të ndryshme.

LEXONI GJITHASHTU:

• Kapet mbi 50 kg kokainë në portin e Durrësit
• Foto l Vijon kontrolli për sasi të tjera kokaine në anijen në Portin e Durrësit