Deputeti i Partisë Demokratike Dashnor Sula ka shkuar sot si fermer në Parlament në formë proteste.

I ftuar në emisionin “People” në Euronews Albania, Sula tha se arsyeja pse ai proteston në Parlament është për të përfaqësuar çdo qytetar dhe blegtorë të zonave rurale.

“Dita e sotme është një ditë e veçantë sa i përket qytetarëve shqiptarë për miratimin e buxhetit 2025. Simbolika ime ishte e qartë sepse unë vij nga zona rurale, ajo e Elbasanit ku ka shumë bujq dhe blegtorë të cilët përballen çdo ditë me problematika dhe vështirësi të mëdhaja duke punuar dhe kur vjen puna në fund të ditës, me produktet të cilat ato prodhojnë, ndjehen të pavlerësuar dhe të zhgënjyer nga gjithë situata në të cilën ndodhen”, tha ai.

Deputeti Sula gjithashtu u ndal në disa shifra duke bërë të ditur se shqiptarët sot të cilët jetojnë në fshat, pra mbi 40% , ndihen të fyer me këtë buxhet të vitit 2025.

“Sot është dita për çdo shqiptar që jeton në fshat. Nga 8.2 miliardë euro, blegtorisë dhe bujqësisë i jepen vetëm 40 milionë euro. Kosova e ka mbi 100 milionë euro, në një kohë që bujqësia gjeneron 20% të vendeve të punës në gjithë sektorin dhe jep 18% të produktit të brendshëm bruto”, shtoi deputeti Dashnor Sula.

Së fundmi ai paralajmëroi për disa çudira si rezultat i një studimi të bërë nga vetë ai.

“Kam bërë një studim nisur nga INSTAT dhe institucione të tjera. Ju garantoj që do shihni çudira. Janë mijëra krerë dhe siç është bërë shpopullimi i njerëzve është bërë dhe shpopullimi i bagëtive. Fshatarët ikin, ata që kanë ngelur janë drejt moshës tretë”, theksoi Sula.

LEXONI GJITHASHTU

• “Nuk jam hajdut”, Dash Sula: Ja pse protestoj
• VIDEO| Blegtorët në Lushnjë derdhin qumështin në rrugë: Na ulën me 30 lekë çmimin