Izraeli ul flamujt në shenjë zie pas vrasjes së dy diplomatëve në SHBA

Flamujt në të gjitha misionet diplomatike të Izraelit në mbarë botën do të ulen në gjysmë shtize në shenjë zie, pas vrasjes së dy diplomatëve izraelitë në Uashington DC. Lajmin e konfirmoi Ministri i Jashtëm izraelit, Gideon Sa’ar, gjatë një konference për shtyp.

“Ministria e Jashtme në Jerusalem dhe misionet tona diplomatike do të ulin flamujt për të nderuar Yaron Lischinsky dhe Sarah Milgrim, anëtarët tanë të ndjerë të stafit diplomatik,” tha Sa’ar.

Më herët, Kryeministri Benjamin Netanyahu urdhëroi masa të shtuara sigurie për të gjitha ambasadat dhe konsullatat izraelite, duke e cilësuar ngjarjen si rezultat të “nxitjes kundër Izraelit dhe një shfaqje të trishtë të antisemitizmit”.

Ngjarja tragjike ndodhi të mërkurën në mbrëmje jashtë Muzeut Hebraik të Kryeqytetit në Uashington, DC. Sipas autoriteteve amerikane, një burrë dhe një grua – të dy diplomatë izraelitë – u qëlluan për vdekje nga një person i armatosur 30-vjeçar, i identifikuar si Elias Rodriguez. Shefja e Policisë Metropolitane, Pamela Smith, deklaroi se i dyshuari bërtiti “Liri për Palestinën” gjatë arrestimit të tij.

Ngjarja ka tronditur opinionin publik ndërkombëtar dhe ka nxitur reagime të ashpra nga zyrtarë të lartë në Izrael dhe SHBA, të cilët e kanë dënuar vrasjen si një akt të rëndë urrejtjeje.

LEXONI GJITHASHTU:

• Raporti: Sulmet izraelite në Gaza vrasin mbi 16,500 fëmijë që në nisje të ofensivës
• BE akordon 150 miliardë euro për industrinë e mbrojtjes, me Ukrainën si vend partner