“Jam gocë Tirone”! – Flet kandidatja e parë shqiptare në Parlamentin britanik

Sara Gezdari është shqiptarja e parë në Britani që konkurron për deputete në parlamentin e vendit përkrah partisë konservatore.

E ftuar ne Euronews Albania, Sara tregon eksperiencën e saj si kandidate dhe vështirësitë që ka kaluar për të arritur postin që mban sot.

Ajo shprehet se fillimisht ishte pak intimiduese, po për të kjo është një ndër eksperiencat më të bukura në jetë.

Për të qenë kandidate Sara ka kaluar rreth 8 provime, të cilat ajo i ka kaluar me sukses.

“Unë isha fytyra e re e partisë konservatore, shkoi shumë mirë, unë u kënaqa. Ishte pak intimiduse të flasësh para 3 mijë vetave live dhe të marrësh të gjithë pyetjet, por është një nga eksperiencat më të bukura të jetës sime. Sistemi politik është komplet ndryshe këtu, ti bën disa provime që të marrësh statusin e kandidatit brenda partisë tënde, janë rreth 4-5 provime gjatë 6 muajve dhe pasi kalon këto provime duhet të kandidosh ne zonën që ti do dhe aty pastaj janë 3 provime te tjera dhe në fund janë anëtarët e partisë së asaj zone që të zgjedhin” tha Gezdari.

Politikania e re shprehet se është kandidate në një zonë shumë afër Londrës. Gjatë fushatës ajo ka takuar shumë shqiptarë, të cilëve i është prezantuar si gocë Tirone.

“Zona ku unë kandidoj është një zonë shumë afër Londrës. Ka dhe shqiptarë. Këtu bëhet komplet ndryshe fushata, shkon derë më derë. Na ka rastisur ndonjëherë që u kamë thënë shqiptarëve jam gocë Tirone dhe më kanë thënë për kafe. Janë gjithmonë shumë mikpritës dhe pse shteti po kalon një periudhë të vështirë”, tha ajo.

LEXO GJITHASHTU:

• Kush pritet të fitojë zgjedhjet në Britaninë e Madhe, publikohet sondazhi final
• Altin Dumani vizitë në Britani: SPAK rrit bashkëpunimin me partnerët ndërkombëtarë