Jashari i kërkon Brugge largimin, Milan në pritje të vendimit të klubit

Ardon Jashari i ka bërë të ditur drejtuesve të Klab Bryzh se nuk dëshiron më të jetë pjesë e skuadrës, ndërsa kërkon me patjetër largimin drejt Milanit. Ekipi belg nuk po kryen asnjë lëvizje, ndërsa pret ofertën e radhës nga kuqezinjtë.

Telenovela Jashari-Milan duket se do të zgjasë më tepër nga sa pritet, e do të na shoqërojë përgjatë gjithë kësaj vere.

Kur u duk se palët i dhanë fund tratativave është vetë futbollisti që ngulmon të largohet, madje duke pasur dhe një përplasje me drejtuesit e skuadrës belge.

Sipas mediave atje, raportohet se Jashari ka debatuar me krerët e Brugge dhe u ka deklaruar se nuk dëshiron të qëndrojë më në Belgjikë dhe se destinacioni i tij i radhës do të jetë Milani.

Kjo konfirmon dhe një herë se nuk ka akord mes lojtarit dhe ekipit aktual, por në anën tjetër Milani nuk ka ndërmend të ndryshojë gjë. Sipas presidencës, 38 milionë euro në total janë mjaftueshëm për këtë futbollist, pavarësisht kërkesës së bërë nga Brugge që dëshiron 40.

Ndër të tjera, Jashari u ka bërë të ditur belgëve se nuk do të stërvitet në ditët në vijim kur dhe të kthehet atje, me shpresën se do të përfitojë nga kjo situatë e të largohet drejt Serisë A. Presidenti Scaroni pohoi më herët se për mesfushorin shqiptar nuk do të ofrohet më tepër pasi vetë ai dëshiron të bashkohet, pra duke nënkuptuar që akordi do të arrihet vetëm me një shumë të arsyeshme.

LEXONI GJITHASHTU: 

• Plot 2 mld euro, cili është trajneri që ka shpenzuar më tepër në merkato

• Chelsea kërkon 30 milionë euro për kartonin e Armando Brojës