Jozefina Topalli: Vota e diasporës, rol kyç në rotacionin politik në Shqipëri

Në një intervistë për Euronews Albania, Jozefina Topalli bisedoi me gazetaren Greta Topjana mbi angazhimin e saj të ri si Koordinatore Kombëtare e Partisë Demokratike për Diasporën dhe përpjekjet për të mundësuar pjesëmarrjen e shqiptarëve që jetojnë jashtë vendit në procesin e votimit.

Topalli ka theksuar se angazhimi i saj i ri është një sfidë e rëndësishme, duke pranuar se detyra që i është ngarkuar është një përpjekje shumë e madhe dhe me rëndësi të jashtëzakonshme.

“Unë nuk i fshihem sfidave politike dhe vështirësive. E kam pranuar detyrën që më është caktuar, e cila është shumë unike planetarisht. Besoj se nëse ka një vullnet të fuqishëm dhe punohet shumë, por kësaj here vendimtari dhe faktori kyç që do ta bëjnë rotacionin është diaspora, shqiptarët që jetojnë jashtë dhe mundësia që do u jepet atyre për të votuar,” tha Topalli.

Ajo sqaroi gjithashtu se, ndonëse fondet janë të kufizuara për organizimin e aktiviteteve të mëdha, Partia Demokratike është angazhuar për të punuar në zyrat e hapura në vendet ku jetojnë shqiptarët, me ndihmën e mbështetësve të opozitës.

“Nuk është se kemi shumë fonde për të bërë takime luksoze nëpër stadiume apo hotele, por po përpiqemi që me ndihmën e dashamirësve të opozitës të punojmë në zyrat e hapura në vendet ku ata jetojnë,” shtoi Topalli.

Topalli gjithashtu beson se diaspora shqiptare ka një potencial të jashtëzakonshëm për të ndikuar në proceset politike të Shqipërisë.

Sipas saj, në 10 vitet e fundit, më shumë se 1 milion shqiptarë kanë emigruar jashtë vendit, dhe nëse do të ketë një mobilizim të fuqishëm dhe sensibilizim të tyre, ky grup mund të ketë një ndikim të madh në rotacionin politik në Shqipëri.

“Besoj se pesha numerike e shqiptarëve që kanë të drejtë vote jashtë Shqipërisë është e barazpeshuar me peshën elektorale të votave brenda vendit. Megjithatë, duhet parë se sa ata do të mobilizohen për t’u regjistruar dhe votuar,” tha ajo.

LEXONI GJITHASHTU:

• Jozefina Topalli me shqiptarët në New York: Vota e diasporës, shpëtim për Shqipërinë
• “Gerti ishte ndryshe”- Topalli shpërthen në lot, lë në mes prononcimin për media