Kalaja e Gjirokastrës, monumenti më i vizituar në vend për vitin 2025, me mbi 308 mijë vizitorë

Kalaja e Gjirokastrës është shpallur monumenti më i vizituar në Shqipëri për vitin 2025. Kështjella e gurtë ka mirëpritur gjithsej 308 mijë vizitorë, duke kryesuar listën e monumenteve kulturore më të frekuara në vend.

Pas saj renditet Parku Kombëtar i Butrintit me 295,152 vizitorë, ndërsa në vijim vjen Muzeu “Gjergj Kastrioti” në Krujë dhe monumente të tjera me rëndësi historike.

Krahasuar me vitin 2023, kur Kalaja e Gjirokastrës ishte shpallur gjithashtu monumenti më i vizituar, numri i vizitorëve është rritur me 52%, një tregues i qartë i interesit në rritje për trashëgiminë kulturore dhe historike të qytetit.

E lidhur ngushtë me historinë e Gjirokastrës, Kalaja përmendet për herë të parë si qytet dhe kështjellë në vitin 1336. Megjithatë, historianë të ndryshëm mendojnë se ekzistenca e saj është edhe më e hershme. Kulmin e zhvillimit historik Kalaja e arriti gjatë periudhës së Pashallëkut të Janinës, kur Ali Pashë Tepelena ndërmori një sërë ndërtimesh dhe ndërhyrjesh, duke i dhënë asaj fizionominë arkitektonike që ruan edhe sot.

Sot, Kalaja e Gjirokastrës është jo vetëm një monument historik, por edhe një skenë e rëndësishme kulturore, ku zhvillohen festivale folklorike, duke u kthyer në një nga simbolet më përfaqësuese të qytetit dhe të trashëgimisë shqiptare.