Kalanë e Rozafës e vizituan mbi 10 mijë turistë në qershor

Drejtoria Rajonale e Trashëgimisë Kulturore Shkodër ka bërë një bilanc të vizitorëve që kanë preferuar të shohin pikat turistike të këtij qyteti e në veçanti të atyre që janë regjistruar si vizitorë të kalasë së Rozafës.

Muaji qershor ka rezultuar të ketë qenë i suksesshëm përsa i përket numrit të lartë të turistëve, vendas e të huaj. “Muajin qershor të vitit 2022, e përmbyllëm me 10,358 vizitorë që zgjodhën Kalanë e Rozafës si një ndër destinacionet më të preferuara këtë verë”, bën të ditur DRTK Shkodër, në njoftimin e saj.

Thënë ndryshe, bëhet fjalë për 4, 421 vizitorë më shumë në krahasim me të njëjtën periudhë të një viti më parë.

Kjo shifër e lartë vizitorësh, shënon një rritje motivuese për turizmin kulturor dhe interes të shtuar për vizitat në sitet e trashëgimisë.

Më herët DRTK Shkodër njoftoi edhe nisjen e punës për hartëzimin e banesave të shpallura “Monumente Kulture” dhe vendosjen e pllakateve të mermerit, një nismë që do të ndihmojë vizitorët në identifikimin e këtyre monumenteve.

LEXONI GJITHASHTU:

• Shkodra njeh rritje në turizëm, ‘Rozafa’ më e vizituara