“Kallëzimet e opozitës për 11 majin janë bërë me prova”, Berisha: SPAK i shpërfilli

Kreu i Partisë Demokratike, Sali Berisha, ka reaguar të enjten pas deklaratave të kreut të SPAK, Altin Dumani, në lidhje me hetimet për krimet zgjedhore.

Berisha akuzon organin e posaçëm të drejtësisë se nuk ka marrë në shqyrtim kallëzimet penale të bëra nga opozita për parregullsitë në zgjedhje, ndonëse, sipas tij, ato janë shoqëruar me prova të pakundërshtueshme.

“Asnjë kallëzim penal i opozitës nuk është bërë pa prova. Unë çdo ditë kam paraqitur prova për farsën e 11 majit”, deklaroi Berisha, duke nënvizuar se SPAK nuk ka reaguar ndaj denoncimeve që janë bërë nga opozita për procesin zgjedhor.

Sipas Berishës, kreu i SPAK zbaton një standard të dyfishtë në trajtimin e çështjeve, duke vepruar vetëm mbi ato kallëzime që “i interesojnë Edi Ramës”.

Në deklaratën e tij, Berisha shkoi më tej, duke e cilësuar Dumanin si “avokat kryesor të krimit elektoral të Edi Ramës”, dhe përgjegjës të drejtpërdrejtë për mosveprim ndaj parregullsive të denoncuara.

“Me amnistimin e krimit elektoral, ai de facto jep licencë për farsën elektorale të partisë së krimit. Është një skandal të thotë se nuk ka pasur prova. Unë çdo ditë kam paraqitur vetëm prova – madje më pak se një të dhjetën e atyre që kemi në dispozicion,” deklaroi kreu i PD.

LEXONI GJITHASHTU:

• Dumani për krimet zgjedhore: Kemi pasur efekt parandalues, 39 raste ende nën hetim
• Dumani bën bilancin për krimet zgjedhore: Kallëzimet e partive politike të paplota