Gjykata e Apelit ka lënë në fuqi vendimin e Gjykatës së Tiranës për nisjen e hetimeve ndaj Autoritet të dosjeve pas kallëzimit të ish-presidentit Ilir meta për falsifikim dhe shpërdorim detyre.

Prokuroria e Tiranës ishte kundër këtij vendimi pasi kishte vendosur mos fillim të procedimit penal.

“Çështja në apel u shqyrtua mbi bazën e ankimit të  bërë nga Prokuroria pranë Gjykatës së Shkallës së parë Tiranë, që kërkoi ndryshimin e vendimit të gjykatës dhe lënien në fuqi të vendimit mbi “Mosfillimin e procedimit penal. Në përfundim të gjykimit në apel, sot më datë 01.06.2023 në dhomë këshillimi, Gjykata e Apelit të Juridiksionit të Përgjithshëm, e përbërë nga gjyqtar Genti Shala, vendosi: Lënien në fuqi të vendimit me Nr. 1959 Akti, datë 18.11.2022 të Gjykatës së Rrethit Gjyqësor Tiranë”, thuhet në vendimin e Apelit.

Në shtator të viti të shkuar kreu i Partisë së Lirisë, Ilir Meta kallëzoi Autoritetin e Dosjeve, për shkeljet e rënda dhe të qëllimshme që i ka bërë ky institucion, sipas tij ligjit organik për dosjet e ish-Sigurimit të Shtetit.