‘Kam kërkuar të hetohen policët’, Sveçla reagon për vrasjen e gruas shtatzanë

Ministri i Punëve të Brendshme të Kosovës, Xhelal Sveçla ka reaguar për herë të parë në lidhje me ngjarjen e rëndë të ndodhur mbrëmjen e së mërkurës në Prishtinë, ku 35-vjeçarja Hamide Magashi, e cila ishte shtatzënë, u vra nga ish-bashkëshorti, Sokol Halili para oborrit të maternitetit.

Përmes një postimi në rrjetet sociale, Sveçla u shpreh se është i tronditur nga kjo ngjarje dhe se ka kërkuar angazhim nga policia për arrestimin e autorit.

Sveçla shprehet se ka kërkuar gjithashtu, edhe hetimin e zyrtarëve policorë që janë marrë me këtë rast.

“Si të gjithë qytetarët e vendit tonë, jam tronditur nga vrasja makabre e Hamide Magashit dhe fëmijës së saj pak orë pa lindur nga ish-bashkëshorti i saj. Nga Policia e Kosovës kam kërkuar angazhim maksimal të të gjithë zyrtarëve policorë për arrestimin e menjëhershëm dhe sjelljen para drejtësisë të kriminelit dhe vrasësit të dyfishtë, Sokol Halili. Arrestimi dhe drejtësia janë urgjenca e këtij rasti dhe ftoj edhe qytetarët të bashkëpunojnë me policinë nëse kanë informata që mund të lehtësojnë apo përshpejtojnë këtë proces.

Po ashtu, që nga momentet e para e në vazhdimësi kam kërkuar raporte të detajuara mbi rastin dhe historikun që nga informata e parë zyrtare deri në momentin e aktit makabër. Në të njëjtën kohë kam kërkuar përfshirjen e Inspektoratit Policor të Kosovës për hetimin e punës, veprimeve apo mosveprimeve të zyrtarëve policorë të përfshirë në trajtimin e këtij rasti në secilën instancë. Pa asnjë dilemë, sapo të pranoj zyrtarisht raportet e kërkuara, do të merren të gjitha masat e nevojshme ndaj kujtdo që me apo pa vetëdije mund të jetë përgjegjës. Ju siguroj që janë angazhuar të gjitha kapacitetet e nevojshme policore që sa më parë ky kriminel të arrestohet dhe të sillet para organeve të drejtësisë”, shkroi Sveçla në Facebook.

Policia e Kosovës kërkon ndihmë nga qytetarët për të dhënë informacione nëse kanë dijeni se ku ndodhet autori i vrasjes së 35-vjeçares në maternitetin e Prishtinës.

Që prej mbrëmjes së djeshme policia është në kërkim të Sokol Halilit, i cili dyshohet se mund të jetë larguar edhe jashtë vendit.

LEXONI GJITHASHTU

• Policia u kërkon ndihmë qytetarëve për autorin e vrasjes së gruas shtatzënë
• Ekzekutimi i gruas shtatzënë, prokuroria: Që prej 13 shtatorit me urdhër-mbrojtjeje
• Vrasja e gruas shtatzënë në Prishtinë, reagon kryeministri Albin Kurti