“Kambana më e madhe e alarmit deri sot”, Rama reagon për vrasjen e policit në Veri

Kryeministri Edi Rama ka reaguar pas vrasjes së efektivit të policisë në veri të Kosovës.

Përmes një postimi në Twitter, Rama e cilëson vrasjen e policit në Kosovë si “kambana më e madhe e alarmit deri më sot për rrezikun e vazhdueshëm të eskalimit të krizës së zgjatur në një konflikt të armatosur”.

“Kriminelët që i morën jetën një njeriu të pafajshëm, i cili shërbente nën uniformën shtetëtore të forcave të rendit të Republikës së Kosovës, duhet të dalin përpara drejtësisë. Komuniteti euroatlantik duhet të mbledhë të gjithë forcën e tij imponuese dhe të ulë pa kthim, Kosovën dhe Serbinë në tryezën e Dialogut të Normalizimit. Thirrja e një konference të jashtëzakonshme paqeje, nën mbikqyrjen e garancinë e Bashkimit Europian dhe Shteteve të Bashkuara, e njëkohësisht marrja e të gjitha masave të jashtëzakonshme me KFOR-in, për moslejimin e eskalimit të mëtejshëm të situatës, janë një domosdoshmëri strategjike jo vetëm për rendin e sigurinë në Kosovë sot, po edhe për paqen e të ardhmen e rajonit nesër, përpara sesa kriza e zgjatur në Veriun e Kosovës të dalë jashtë kontrollit e të kthehet në një zjarr destabilizues për krejt rajonin”, shprehet Rama.

LEXONI GJITHASHTU:

• Vrasja e policit në Kosovë, reagon Begaj: Akt kriminal për stabilitetin e rajonit
• Zbulohet identiteti i policit të vrarë në veri të Kosovës