Kampionati Evropian për femra, Anglia finalistja e parë

Anglia mposht Italinë dhe siguron finalen e Kampionatit Evropian për femra.

Anglia është skuadra e parë finaliste e Kampionatit Evropian për femra, pasi mundi Italinë me rezultatin 2-1. Gjysmëfinalja e dytë do të zhvillohet mbrëmjen e sotme mes Gjermanisë dhe Spanjës.

Gjysmëfinalja e parë e këtij turneu, që po mbahet në Zvicër, dhuroi emocione të forta. Italia kaloi e para në avantazh me golin e Bonanseas në minutën e 33-të, duke i dhënë sfidës një ritëm të lartë.

Në pjesën e dytë, anglezet morën kontrollin e lojës dhe u shfaqën të rrezikshme në disa episode. Në fund të kohës shtesë, ishte Agyemang që barazoi rezultatin në 1-1, duke çuar ndeshjen në kohën shtesë prej 30 minutash.

Në minutën e 119-të, Kelly pati mundësinë të vendoste fatin e ndeshjes me një penallti, por e humbi. Megjithatë, topi iu kthye sërish dhe 27-vjeçarja e Arsenalit e shtyu në rrjetë, duke vulosur fitoren 2-1 për Anglinë.

Anglia shkon kështu në finalen e madhe të Kampionatit Evropian, ku do të përballet me fituesin e çiftit Gjermani-Spanjë, të cilët përballen këtë mbrëmje.